唔知大家最近有冇留意到有關 Johnson’s baby 宣佈將於2023年全球停售含有滑石粉成分爽身粉嘅新聞呢。
早喺七十年代已經有醫生懷疑滑石粉同卵巢癌有關。因為佢哋係一啲患有卵巢癌嘅女士子宮體內發現咗一啲矽晶體亦即係滑石粉嘅成份之一。而哩d 女性都習慣將爽身粉塗抹喺私處，令敏感部位乾爽啲、減少異味或者因摩擦而引起嘅皮膚不適。目前有不少醫學報告顯示女性如果經常將滑石粉塗抹喺私處，會增加罹患卵巢癌風險。
直到 2016年 Johnson ＆ Johnson 終於因為爽身粉含有或可引致卵巢癌成分嘅滑石粉，但未有警告用家其爽身粉有致癌風險，而係美國被告上法庭，最終被判需賠償5.6億港元予一名患有卵巢癌女士。
點解而家爽身粉冇以前咁普及？
其實喺七、重八十年代爽身粉好盛行嘅時候，有接近七成嘅使用者都係成年人，佢哋會用嚟查喺身體用作吸濕同保持乾爽。而用喺小朋友或者嬰兒身上，可以預防尿布疹達到吸濕乾爽嘅效果。但係之後已經唔建議小朋友使用啦，因為發現吸入過多嘅粉末會令到嬰幼兒出現咳嗽，呼吸系統嘅慢性疾病或者肺部損傷。所以而家我哋見到市面上一般比BB用嘅pat pat cream都已經係做咗cream狀嘅質地，而唔再使用粉狀嘅產品用喺嬰幼兒身上。
滑石粉既作用到底有咩作用？
滑石粉係一種增滑劑，增白劑用嚟減低摩擦力同埋調較顏色。所以其實係我地日常生活中其實係好常會接觸到。化妝品例如碎粉、粉餅、眼影；家居清潔用品例如乳膠手套、紙巾、衛生用品；而食品就例如蜜餞、果乾等，其實都有機會係含有滑石粉。
既然咁危險，點解仲未禁？
其實百分百淨化嘅滑石粉係唔會對人體構成傷害嘅。而滑石粉會增加患癌風險嘅原因，係因為當中含有石綿哩d 雜質。而石綿係已知嘅一級致癌物，過往曾經廣泛咁用係建築材料上，喺發現有高度治癌風險之後，已經被禁止使用。
咁點解滑石粉入面會搵到石綿呢？
我哋就要追溯返佢嘅來源啦。滑石粉係一種礦物質，好容易可以係黏土礦床嗰度搵到，而通常滑石粉附近都會沉積左石棉，喺採礦嘅時候會一齊採出。所以滑石粉係必須要經過百分百淨化先可以使用。 但係石棉只有頭髮大概20分之1嘅大小，要做到百分百嘅純淨率其實係十分之困難同涉及好高嘅成本。而爽身粉本身係比較平價嘅產品，若果需要用咁高成本去達到百分百淨化嘅話，對企業黎講可以話係冇可能發生嘅事。而作為消費者亦都難以判斷到底滑石粉嘅淨化程度係去到幾高，我哋都只能夠倚賴生產商嘅監管同良心。
而哩個都係 the nerds. 成立嘅其中一個原因。除左係想將一啲安全可靠嘅產品介紹俾大家之外，亦都想增加大家對於唔同成分嘅認識，去選擇一啲安全、冇害嘅產品。大家喺選購產品之前，不防花多少少時間，望一望產品後面嘅成份表，再去作出選擇！